Gwerz Kilhog Dirinonn War un ton anavezet "Pell 'zo di..."

Diskan : Kot, Kot, Kot, Kot, 'me ar c'hilhog, Cholori 'zo dindan va zog !

1.

Tud an Argoad, C'hwi Arvoriz,

Kernividi, Plougastelliz,

Paotred bro-Leon, ha Tregeriz,

Klevit galc'har Dirinonniz !

2.

E Dirinonn, war an dorgenn,

Un iliz kaer en em astenn,

Warni un tour dantelezet,

Gant ur c'hilhog kurunennet.

3.

Na brav e oa gant e gribell,

Ruziet ouzh ar pevar avel,

E c'houg un tammig daoubleget :

Kalz pouez a zo war e spered !

4.

E vrasañ lorc'h, n'eus da nec'hiñ,

Re sklaer ez eo ha difazi,

N'eus digarez da enebiñ,

E lost ! E lost, kaerañ hini !

5.

Savet sonn war e benn a-dreñv

Rak ar gwrizioù 'dle bezañ kreñv,

Al lost a gromm, m'eo un dudi,

Pep ya er vro he deus avi !

6.

Stampet start war e gilhoroù,

Dispont dirakan darvoudoù,

Diwallet gant e zivaskell,

E seblant stourm ouzh pep avel.

7.

Se n'eo nemet ur c'hentañ gwel !

Ar wirionez 'zo disheñvel :

Furnez an amzer hel lavar,

Preder ar c'hilhog eo ar yar.

8.

Mard eo savet war beg an tour

Eo 'vit gwelet, eñ, ar gedour,

Holl yer ar vro, a vilionoù,

E kement korn eus ar maezioù.

9.

Eus Ploñger betek Landreger,

E Kraozon, e Gwineventer,

E Sant-Nouga, Lokeginer,

Bras eo rouantelezh ar yer.

10.

Yer ruz, yer gwenn, yer brizh ouzhpenn,

Divesker gwenn pe tried melen,

Dozverezed, yer da lardañ,

'Zo e wragez, na petra 'ta !

11.

Hor c'hilhog, lemm e zaoulagad,

A zo bepred o toullbapat :

"Daoust ha va yer en em zalc'h mat,

pe lec'h a zo da c'hrozmolat ?"

12.

Gant Dirinonniz e klever

D'an nav warn ugent a c'henver,

Er bloaz tri ha pevar ugent

e c'hoarvez an darvoud divent

13.

D'an devezh-se e Landerne,

E Brest hag e Kemper-Kerne,

Saverien yer en dienez

A youc'h d'an holl o faourentez.

14.

Yer o redek dre ar ruioù,

Gwallgaset gant an otoioù,

Pluñv o nijal en avelioù,

A bep tu klemm hag hirvoudoù.

15.

Dismegañs veur war ouenn ar yer,

Merk disesper al labourer,

Yer marv, displuñv, diniver,

a zo zo krouget ouzh ar voger.

16.

O welet seurt torfed euzhus,

D'an holl galonoù ken doanius,

Kounnar e roue ar gilheien,

A wel pep tra eus e dorgenn.

17.

Treiñ ha disreiñ war e ibil,

Dereat ne ve mont war e gil,

Ar c'hilhog d'en em zifretañ,

'vit kas sikour d'an abretañ.

18.

D'ar mare siwazh e tiroll

War Dirinonn un avel foll :

Lost ar c'hilhog 'zo diframmet,

War an iliz emañ kouezhet

(kasit mar plij daveennoù ar c'hanaouennoù anavezit etre Ar Faou ha Landerne)